Нүүр › Нийгэм › Өвөл, хаврын хүнсний хэрэгцээнд зориулж...

Өвөл, хаврын хүнсний хэрэгцээнд зориулж 15–20 мянган тонн мах, 12 мянган тонн хүнсний ногоо нөөцөлнө

G
Админ
Өвөл, хаврын хүнсний хэрэгцээнд зориулж 15–20 мянган тонн мах, 12 мянган тонн хүнсний ногоо нөөцөлнө

Хүн амын өвөл, хаврын улирлын хүнсний хэрэгцээг тогтвортой хангах, гол нэрийн бүтээгдэхүүний хомсдол болон үнийн огцом өсөлтөөс урьдчилан сэргийлэх зорилгоор Засгийн газар 15–20 мянган тонн мах, 12 мянган тонн төмс, хүнсний ногоо нөөцлөх шийдвэр гаргажээ.

Энэ хүрээнд Ерөнхий сайд Н.Учрал 2026 оны арваннэгдүгээр сарын 14-нд хүнсний бүтээгдэхүүний нөөц бүрдүүлэлтийн ажлын явцтай танилцаж, “Дельтафүүдс”, “Дөмөг хүнс” компанид ажиллалаа.

Төмс, хүнсний ногооны нөөц бүрдүүлэлт 92.8 хувьд хүрчээ

Өнөөдрийн байдлаар 80 гаруй аж ахуйн нэгж, ногоочдоос нийт 11,130 тонн төмс, хүнсний ногоо төвлөрүүлээд байгаа бөгөөд нөөц бүрдүүлэлтийн гүйцэтгэл 92.8 хувьтай байна. Харин махны нөөц бүрдүүлэлтийн хүрээнд одоогоор 3,091 тонн мах бэлтгэжээ.

Засгийн газар 2026 оны улсын төсвийн тодотголд 120 тэрбум төгрөг тусгаж, стратегийн болон гол нэрийн хүнсний бүтээгдэхүүнийг төрөөс худалдан авч нөөц бүрдүүлэхээр шийдвэрлэсэн юм.

Нөөцийн махыг арилжааны банкны хөнгөлөлттэй эх үүсвэр, аж ахуйн нэгжүүдийн өөрийн хөрөнгө болон бондын эх үүсвэр гэсэн гурван сувгаар санхүүжүүлэн бэлтгэж байна. Энэ хүрээнд арилжааны банкуудаас 13 аж ахуйн нэгжид нийт 86.7 тэрбум төгрөгийн хөнгөлөлттэй санхүүжилт баталж, мах бэлтгэх хяналтын гэрээ байгуулжээ.

Нөөцийн мах бэлтгэлд хяналтыг чангатгахыг үүрэг болголоо

Өнгөрсөн хавар нөөцийн махны нийлүүлэлт дутагдах, зарим аж ахуйн нэгж орон нутгийн малчдаас бус зах зээлээс бөөнөөр мах худалдан авч нөөцлөх, бэлтгэсэн махаа зах зээлд бүрэн нийлүүлээгүй зэрэг алдаа гарсныг Ерөнхий сайд онцоллоо.

Тэрбээр энэ удаа өмнөх алдаа, дутагдлыг давтахгүй байхыг анхааруулж, нөөц бүрдүүлэлт, бэлтгэн нийлүүлэлт, хадгалалт, борлуулалтын бүх шатанд хяналт тавьж ажиллахыг холбогдох албан тушаалтнуудад үүрэг болгосон байна.

Тухайлбал, нөөцийн махыг тогтоосон хугацаанд бүрэн бэлтгэж, нийлүүлэлтийн явцад өдөр тутмын хяналт тавих, малчид болон орон нутгаас мах худалдан авч байгаа эсэхийг гарал үүслийн цахим бүртгэл, мал эмнэлгийн хяналтаар баталгаажуулахыг даалгажээ.

Мөн цахим төлбөрийн баримтын системд холбогдсон мах бэлтгэн нийлүүлэгчдийн худалдан авалт, татан авалт, агуулахад төвлөрүүлсэн махны хэмжээ, гарал үүсэл, үлдэгдлийн мэдээллийг dashboard.gov.mn системд тухай бүр үнэн зөв бүртгэх шаардлага тавьсан байна.

120 тэрбум төгрөгийн санхүүжилтийн зарцуулалтыг ил тод болгоно

Төсвийн тодотголоор шийдвэрлэсэн 120 тэрбум төгрөгийн санхүүжилтийн зарцуулалт, хөнгөлөлттэй зээл болон бусад санхүүгийн дэмжлэгийн хэрэгжилтийг ил тод, нээлттэй болгохыг Ерөнхий сайд үүрэг болгожээ.

Үүнд тариаланч, үйлдвэрлэгчдэд олгосон санхүүжилт, төлбөр тооцооны мэдээллийг нээлттэй тайлагнах асуудал багтаж байна.

Төмс, хүнсний ногооны нөөц бүрдүүлэлт 92.8 хувьд хүрсэн ч үлдсэн нөөцийг богино хугацаанд бүрдүүлж, төлөвлөсөн хэмжээ болон нэр төрөл тус бүрээр гүйцэтгэлийг хангахыг холбогдох байгууллагуудад даалгасан байна.

Нөөцийн бүтээгдэхүүнийг хавар үе шаттайгаар зах зээлд нийлүүлнэ

Нөөц бүрдүүлэхээс гадна бүтээгдэхүүнийг зах зээлд хэрхэн нийлүүлэх, иргэдэд ямар үнээр, ямар хүртээмжтэй хүргэх асуудалд онцгой анхаарах шаардлагатайг Ерөнхий сайд тэмдэглэжээ.

Иймд нөөцийн мах, төмс, хүнсний ногоог хаврын улиралд зах зээлд нийлүүлэх нэгдсэн төлөвлөгөөг урьдчилан боловсруулж, агуулахад удаан хугацаагаар хадгалах бус, зах зээлийн эрэлт, нийлүүлэлт, үнийн нөхцөлтэй уялдуулан үе шаттай борлуулах зохион байгуулалт хийхийг үүрэг болгосон байна.

Түүнчлэн нөөцийн бүтээгдэхүүнийг зах зээлийн үнээс боломжийн, тогтвортой үнээр иргэдэд хүргэх борлуулалтын цэг, хуваарь, тээвэр, түгээлтийн сүлжээг урьдчилан тодорхойлж, нийслэлийн бүх дүүрэг болон хүн амын төвлөрөл ихтэй байршилд худалдаалах нөхцөлийг бүрдүүлэхээр болжээ.

Борлуулалтын явцад жижиглэнгийн үнэ, борлуулалтын хэмжээ, үлдэгдэл нөөцөд тогтмол хяналт тавьж, дамлан худалдах, зохиомлоор хомсдол үүсгэх, тогтоосон нөхцөлөөс зөрүүтэй үнээр борлуулах явдлыг таслан зогсоохыг мөн даалгасан байна.

Орон нутгийн хүнсний нөөцийг нэмэгдүүлэх чиглэл өглөө

Ерөнхий сайд аймаг, сумдын Засаг дарга нарт орон нутгийнхаа хүн амын өвөл, хаврын улирлын хэрэгцээг тооцож, нөөцийн мах, төмс, хүнсний ногоо болон бусад гол нэрийн хүнсний бүтээгдэхүүний нөөц бүрдүүлэх ажлыг эрчимжүүлэхийг үүрэг болгожээ.

Засгийн газрын зүгээс хүнсний бүтээгдэхүүний нөөц бүрдүүлэлт нь зөвхөн өвөл, хаврын улирлын хомсдол, үнийн өсөлтөөс сэргийлэх арга хэмжээ төдийгүй малчид, тариаланчид, дотоодын үйлдвэрлэгчдийн бүтээгдэхүүнийг худалдан авч, орлогыг нь дэмжих ач холбогдолтойг онцолсон байна.

Ийнхүү энэ жилийн нөөц бүрдүүлэлтийн хүрээнд бүтээгдэхүүний гарал үүсэл, санхүүжилт, хадгалалт, борлуулалтыг цахим бүртгэл, хяналтын тогтолцоонд хамруулж, хүнсний хангамжийн тогтвортой байдлыг хангахад чиглэж байна.

Сэтгэгдэл 0
Эхний сэтгэгдлийг бичээрэй.